* * *

Лызьяс вылын лэчыд тӧвлы паныд
петны шонді керкаысь он пов.
Некод тэнӧ, пӧрысьӧс, оз янӧд,
пӧрысьяс моз он на кӧ и ов.
Лымйыс вевттяс мусӧ вывті кыза,
оз ло еджыд эшкыныслы пом.
Сыысь, дерт жӧ, ачыд абу мыжа,
мыйла эн ло важся кодьыд том.

Но он сетчы ставсӧ венысь кадлы,
паччӧр вылад мыштӧ он на пӧж,
котӧртан на нюмъялӧмӧн радлан,
лызь бӧрад кор кольӧ эзысь бӧж.

Шудаяслы козин пыдди усьӧ
кӧч гӧнысь на кокни-небыд лым.
Медся шуда мортӧн
сійӧ-й шусьӧ,
кодлӧн сьӧлӧм нэм помӧдзыс пым.