ЭНОВТӦМ КЕРКА

Ӧшиньяссӧ тувъялӧма пӧвйӧн,
кильчӧ ӧдзӧс вомӧналіс тас,
коньӧртчыштӧм керка пытшкын тӧвйӧ
сійӧс дзикӧдз эновтысьлӧн пас.

Кытчӧ сылӧн кӧзяиныс лои,
мыйла сылы мустӧммис важ горт?
Менӧ йирӧ чужан сиктлӧн дойыс
сы вӧсна, мый вӧвлі сэтчӧс морт.

Гашкӧ, карӧ корсис лэччан ордым,
аддзис сэтысь бурджык гаж да шуд,
челядьыс эз кужны лэдзны сёрдӧ
нянь быдтысьлысь зумыд да ён вуж.

Гажтӧмджык на мӧвпӧн вежӧр ӧзйӧ...
Войналӧн на кылӧ курыд кӧр!
Кымын пиӧс нуис тайӧ позйысь,
но эз вайӧд гортас найӧс бӧр?

Мед жӧ дона нимъясныс оз вунны!
Кӧть оз дзирдав ӧшиньясас би,
кутанныд кӧ коркӧ таті мунны,
казьтыштӧй бур кывйӧн найӧс ті.