СИГУДӦК

Сиӧма С. Налимовлы, сигудӧкъяс вӧчысь ыджыд мастерлы.

Радлунсӧ бур йӧзлы корсьны
мастерӧс чуксаліс мог:
кор сылӧн сигудӧк ворсіс,
гӧль мортыд вунӧдліс шог.
	Сигудӧк, сигудӧк, ворс вай,
	мед кӧть тэ ёна нин важ,
	пӧльяслӧн нор сьылан горкӧд
	гӧрддзалан талунъя гаж.

Веськодя некод оз кытшовт
сияслысь чуксасян кыв,
«Шондібан» йӧктыны кытшӧ
сувтӧны бур зон да ныв.

Морт, коді пармаысь петіс,
кӧсйӧмнас эз вӧвлы рам:
вӧр-ваыс сылы и сетіс
шыяссӧ бордъялан сям.

Сигудӧк некор оз куйлы,
шудӧн да радлунӧн тыр,
шондіӧн югдӧдӧм туйлань
миянӧс чуксалӧ пыр.
	Сигудӧк, сигудӧк, ворс вай,
	мед кӧть и ёна тэ важ,
	пӧльяслӧн нор сьылан горкӧд
	гӧрддзалан талунъя гаж.