ПӦРЫСЬ ЛЕСНИК

Сетісны мортыдлы кывлытӧм удж:
яг вылӧ садитны пуяс!
нэриник пожӧмлысь
мыччысьӧм вуж
ловзьӧдны му пиӧ сюйӧ.
— Но, морӧ, — ас кежас
элясьӧ пӧль,
кытчӧ нӧ вӧрсӧ ми лотім?..
Медмича ягным кӧ
лоис нин гӧль, —
дерт, ставсӧ кералім, сотім.
Месӧ кӧть абу зэв сюсь инженер,
абу и ыджыд учёнӧй,
тӧда,
мый ю дорӧ кыскӧм быд кер
зарниысь ёна на дона.
Вӧйӧ да видз вылын
Сісьмӧ кӧ тыр, —
воштӧ и зарниыд донсӧ.
Яндысьтӧг сӧрӧ
учёнӧйным пыр:
пармаыд пыдӧстӧм-помтӧм!..
Сьӧлӧмным потӧ,
кор йиыскӧд тшӧтш
вӧр ылыс мореӧ кывтӧ.
Он, майбыр, Эжваад
гожӧмнад чӧвт
дзикӧдз нин эновтӧм тывтӧ!
Кӧдзны да садитны
выль вӧртӧ, дерт,
быдлаын, аддза ме, колӧ,
медым веж сад пытшкын
мулӧн быд эрд
дзордзалӧ, лолалӧ, олӧ...
Прӧщасӧ сійӧ
мед оз жӧ нин кор,
коді нем жалиттӧм киӧн
пуяслысь шувгӧм
и лэбачлысь гор
ассьыс моз сӧвестьсӧ виӧ.
Ас кежас сёрнитӧ-вашкӧдчӧ морт,
садитӧ яг вылӧ пуяс.
На лыдысь быдӧнлӧн
вежӧдысь борд
паськалас
шонділань туйын.