ВАЖ ТУИС

Паччӧр пельӧсын важ туис
бура видзӧ сов:
аслам пӧльлӧн киподтуйыс,
сылӧн ловъя лов...
нэмнас сійӧ аслас пӧчлы
эз куш ӧти гоз
сюмӧдысь да разйысь вӧчлы
мича да бур доз.
Зарава кӧть кӧдзыд ырӧш
сэтчӧ кисьт да ю,
сэсся бара содты тырыс
да кузь туйӧ ну.
Жар лунад оз шонав сюмӧд,
сім сійӧс оз сёй,
топыд пыдӧс пырыс юмыд
оз пет весиг войт.
Школа кӧджсӧ кӧть эз вуджлы,
быдмис вывті гӧль,
Пифагорысь бура кужліс
муртасьнысӧ пӧль.
Босьтас сунис ӧти киас,
мӧдас — туис кыш.
— Видзӧд, — шуас, — дона пиӧй...
Дона пилы дыш
пӧльлысь кужанлунсӧ босьтны,
сылысь шыла-ем,
медым сямлуныс эз косьмы
лыдтӧм-лыда нэм.
Кодлы ӧні мича туис
эз эськӧ нӧ ков?
...Укӧрбаӧн аслым шуны
курыд кыв ог пов.