ВИНА ГАГ

Важӧн шырсьывтӧм, зэв няйт,
кевмысьӧмӧн, нора
вина вылӧ ӧти шайт
менсьым бара корӧ.
Коді тайӧ? Верстьӧ морт,
кык киа, кык кока,
дзоргӧ, кыдзи сюра орт,
магазинъяс бокӧ,
Ӧти шайтыд абу жаль,
скӧрма кӧ нин, сета,
кӧть и некутшӧм медаль
таысь оз жӧ пет-а!
Збыльысь, коді, шуа тэ,
кыдзи татчӧдз воин,
ассьыд сӧвесть дзикӧдз мед
няйт гӧптӧ моз лоин?
Гудыр синъястӧ эн дзеб,
мӧдысь ки эн нюжӧд...
Мышкыд абу ёна жеб,
пӧсьӧдлы вай уджӧн!
Медым ас вылад не рад
ачыд лоан витысь,
кутасны кӧ, вина гаг,
шуны паразитӧн!