ЭН ЫШМЫ ТЭ, ШОФЁР!

Кольӧм 1986 воын республикаса туйяс вылын пӧгибнитісны 103 морт, ёна доймисны 1036-ӧн.
Медсясӧ тадз лои шофёръяслӧн ышмӧмӧн ветлӧм вӧсна.

Эн ышмы тэ, шофёр,
кор петан кузь туйӧ
да аслад автобусӧн
войтырӧс нуан;
эн тэрмась,
кор Емвалань, Лӧкчимлань каян
да машина кузолад
мыйсюрӧ ваян.

Асфальт да гудрон
кӧть и чорыд да шыльыд,
но шог вылад
вермас на лоны и вильыд.
Эн личӧдлы руль вывсьыд
мудзыштӧм китӧ,
эн орӧдлы тормозкӧд
колана йитӧд.

Он вӧлӧн ӧд мун тэ, —
эн вунӧд! — кыдз важӧн
важ пӧльясыд ветлісны
асланыс гажӧн...
Сё вӧв вына сьӧлӧмыс
биа моторлӧн
кузь вӧлӧкъяс вуджигӧн
оз ланьтлыв-орлыв.

Но пеж курыд ваыдлы
вӧля кӧ сетан,
сэк асьтӧ и мукӧдӧс
дойдавны петан...
И суд водзӧ сувтан!
Тэ синватӧ чышкав,
но медыджыд мыжсьыд
он дзебсьы, он пышйы!

Эн тэрмась тэ, шофёр,
эн ышмы лёк ӧдӧн,
кыдз помасьлӧ ышмӧмыд, —
зэв бура тӧдан!..
Мед туй вывті
мунысьяс-локтысьяс лыдысь
пыр дзоньвидза лоасны
быдлаын, быдӧн.