ЯЙ ЖӦРИТЫСЬ

Кывзысьны ог кӧсйы, но ӧд кыла:
гыжсӧ кодкӧ ёсьтӧ миян вылӧ,
горшлуннас да лёклуннас оз пӧт...

Пырис ресторанӧ ӧти Жмот.
Пӧрччысис да пуксис пызан сайӧ,
пӧльтіс ассьыс кыз рушкусӧ яйӧн,
висьтавлыны кутіс анекдот:
— Сиктыд яйнад ӧні вывті гӧль...
Аслас пӧчлы шуӧ синтӧм пӧль:
— Он на талун лӧсьӧдчы кӧ пӧрны, —
петалам вай, Марпа, тэкӧд гӧрны...
Жмотлӧн плешкыс лӧсталӧ кыз госӧн.
			Госӧн?
		Гашкӧ, восӧн?
Пиньсӧ кеслӧ: — Вот и думайт вай,
пӧльысь-пӧчысь мыйта киссяс яй?
	Пуксим кӧ ми ӧти пызан сайӧ,
	воча кывсӧ сетны менам пайыс.
— Яйыд, — шуа, — шедӧ сьӧкыд уджӧн.
Жӧритны тэ сійӧс, аддза, кужан,
но он сиктын мудзтӧд ассьыд мыш,
карбердтіджык ветлан, кыдзи шыш,
			аслад кокни туйӧд,
		вӧчны кужан сӧмын куйӧд
да и сійӧс, дерт жӧ нин, он ну,
вынаджыкӧн медым лоис му.