АСЪЯ НЮМ

Асывнад чеччан да мыйла он нюмъёвт,
меліа шу меным: — Шондіа асыв!..
Видзӧдлы, кыаыс оз ӧмӧй чуймӧд,
тэрмасьтӧг лыбӧ кор чӧв ланьтӧм расӧ.

Вӧр-ваыс ас кежас нюмъявны кӧсйӧ,
кыпыдӧн-шудаӧн лоас мед луныс.
Вежтас сай, видзӧд, кыдз ыпнитас-ӧзъяс
йӧзлы и дзоридзлы радлунсӧ нуны!

Узьны оз позь татшӧм вежалӧм кадӧ,
сьылӧмӧн пыр эськӧ ытшкыны-гӧрны...
Мыйла нӧ му вылад, ӧтувъя садъяд,
войтырыс чой-вок моз овны оз тӧрны?

Меліа нюмъёвт, кор асывнад садьман,
медым оз гудыртчы шондіа луныс.
Му вылын олысьлӧн медыджыд радлун, —
сьӧлӧмас асъя нюм кӧдзавтӧг нуны.