СЬЫЛЫСЬ ЗЭР

Зэр оз синваӧн бӧрд,
сійӧ — сьылӧ
сэк, кор садьмӧдчӧ вӧр,
лымйыс сылӧ;
сьылӧ гожся водз асылын,
садьмӧдӧ тэнӧ,
узьтӧм здукъястӧ пасъялӧ
керкалӧн стенад;
сійӧ чуксалӧ видз вылӧ
ӧдйӧджык мунны,
сылӧн дзоридза морӧсас
пырысь-пыр сунны,
медым ытшкигад унаысь
петавлас пӧсьыд,
тӧлын, сы пыдди,
овнытӧ долыд да лӧсьыд.
Зэрыд сьылӧ и ыркыд,
но зарниа арын,
кор нин чиныштас шонділӧн
гожйӧдчан жарыс;
сьылӧ каръяс да миян
деревняяс весьтын,
кӧні свадьбуйтны дась
сё жӧник да невеста.
Зэрыд некор оз бӧрд,
сійӧ — сьылӧ...
Сылысь сьыланкыв
асланыд сьӧлӧмнад кылӧй!