* * *

Мед шонді дзебсис,
синнымӧс оз ёр,
и вӧр-ва лӧнис.
Бара воис ар нин.
Куш борйын куйлӧ
сӧмын косьмӧм кор —
быд пуысь усьӧм
кышакылысь зарни.

Но кодлы мустӧм
татшӧм шуда кад,
кор озырлуныс
ыбысь сиктӧ вуджӧ?
Выль вынъяс чӧжӧ
миян сӧвмысь сад,
а сьӧлӧм зэвтчӧ
босьтчыны выль уджӧ.

Пӧсь аттьӧ тэныд,
сиктын мырсьысь морт,
мый мулысь лов шы
видзан сьӧлӧм бердад,
и садьман водз,
и водан вывті сёр,
мед карса йӧзӧс
юктавны да вердны.

И бара абу ылын
кӧдзыд тӧв,
а сы бӧрын — выль тулыс
да выль гожӧм...
Быд пызан вылын
унджык яй да йӧв
мед лоас Леткаын
и Висер вожын.

Мед шонді дзебсис...
Сылӧн аслас удж!
Но нюммунас,
кор бара аддзас сійӧс,
кыдз веж петаслӧн
нэриник на вуж
крестьянин пилӧн
ловзяс гаддьӧсь киас.