ПОТАНДОРСА СЬЫЛАНКЫВ

Узь тэ, ичӧт ныв, узь,
арся войыд зэв кузь,
волас зэв уна вӧт,
видзӧд, кытчӧдз он пӧт.

Синтӧ пырысь-пыр кунь,
медым сывъялас ун.
Вӧттӧ кылӧдас ёль,
тэныд нинӧм оз коль.

Эськӧ эм тэнад ай,
сӧмын урӧсмис тай:
спиртӧн дубитчӧм гаг
помся ректӧ сельмаг.

Абу морт, — юра нӧш,
тэныд оз юкышт грӧш,
кытчӧдз грӧшыс оз быр,
шӧйтас-буалас пыр.

Яндзим йӧзысь оз тӧд,
эз на зелляас пӧд,
Дзикӧдз палялас кор,
лоас, тӧдан тэ, сёр.

Тэнсьыд бӧрдӧм, бур ныв,
сійӧ ӧні оз кыв...
Ассьыс вежыньтас вом
курыд олӧмлӧн пом.

Узь тэ, ичӧт ныв, узь,
арся войыд зэв кузь.
Ыджыд быдман да, тэ
сылы китӧ эн сет!