ВӦРЫН ЧАРДАЛІГӦН-ГЫМАЛІГӦН

Коркӧ тӧдмавны жӧ колӧ
ассьыд сьӧлӧм вын:
чардысь-гымысь збыль-ӧ лолӧ
сійӧ нэр да кын?

Зэрыс вӧрын менӧ суис,
сэсся кучкис шер,
шуштӧм кымӧр мелань уйис,
кыдзи лёкмӧм зверь.

Чардби лӧсыштіс кузь пуӧ,
орччӧн потіс мӧд,
сюйны юрӧс кутшӧм гуӧ —
эг нин бура тӧд.

Ачыс гымньӧлыс тшӧтш сорсис
сотны кутшӧм ньыв, —
меным плешкӧ чӧвтны корсис
биа адзлас йыв.

Повзьӧмысла дыр на доли:
— Енмӧй, менӧ видз,
талун ловйӧн кӧ ме коля,
сувтӧда тэд сись!..

Кымӧр Эжва сайӧ вуджис,
ылын ланьтіс гым,
енлы сетны ассьым уджйӧз
эг нин вӧв зэв пым.

Казьтышті жӧ сисьсӧ сылы,
пуджлі дӧрӧм сос,
кулак чургӧдлі зэв вылӧ,
мися, тэныд — со!