МЫЙ ЛОӦ ВИНА ЮЫСЬКӦД,
КОР СІЙӦ ВЕСЬКАЛАС АДӦ

Ёртӧй кувсис да эз босьт
кувсьӧм йывсьыс справка.
Мӧдар югыдас эз восьт
чӧртыд сылы лавка.

— Курыд зеллятӧ он лак
ӧні, — шуис, — татӧн..
Ачыд мыжа тэ, земляк:
эн во аттестатӧн!

Босьтіс морттӧ курыд шог,
спиртсьыс курыд, збыльысь,
вӧвлӧм гортас пуктіс мог
писькӧдчывны выльысь:

— Лэдзлы лун кежлӧ кӧть, чӧрт,
аслыд вая шкальчик...
Сэсся биа пӧртад йӧрт
да кӧть вылас тальччы!

Дзикӧдз скӧрмис сюра бес:
— Взятка вӧзъян меным?..
Содтіс пӧрт улас кос пес.
— Спирттӧг пӧжсян сэні!..

Вӧлі кӧ, дерт, гижӧдтор,
мый тэ ал-ко-го-лик,
серам вылӧ тэнӧ, морт,
чӧртпиянлы коли.

Татчӧ веськалысь быд гӧсть
медым тӧдӧ, пиӧ,
серам овлӧ биысь пӧсь —
морттӧ медводз виӧ.