ЛУМУМБАЛӦН СЬӦЛӦМ

Кывлан да, —
радысла виччысьтӧг нюмдан:
гораа чуксасьӧ «Патрис Лумумба»,
бара нин тэрмасьӧ,
кытчӧкӧ катӧ,
йылыс Печоралӧн
абу зэв матын.
Лунвывса гӧстьлы
став сьӧлӧмсянь чолӧм!
Виисны тэнӧ,
но, аддза ме, олан,
важ мозыд чуксасян-кыпӧдчан тышӧ,
мачтанад орлалан
сьӧд кымӧр-кышӧд.
Кучикным еджыд
да сьӧд ной кодь кӧть и, —
враг пиньсӧ ми вылӧ
жерйӧдлӧ ӧти.
Ӧтвылысь сійӧс, —
мед чермунас! — ёрам,
тэнад быд вир войтысь
кыпӧдчас дзоридз.
Регыд нин
Африка му весьтын асыв
миян кодь сэзь лоас,
миян кодь ясыд.
Тайӧ оз гӧрд флаг
Печора ю весьтын, —
сьӧлӧм Лумумбалӧн
дӧлалӧ-пессьӧ!