АНАНИЙ РАЗМЫСЛОВ

Уси 1943 вося сентябрь 30 лунӧ,
гуалӧма братскӧй гуӧ Кременчуг кар бердын.

Комын арӧсӧдзыд стопка спирт эг юлӧй,
пыдди пуктылім ми сӧмын юмов чай.
Вевъялам на мӧдысь коркӧ, шулім,
миянлысь оз мырддьыны кӧ пай.
Медся ёна радейтлім веж парма,
ылыстчыны сыысь вӧлі жаль.
Тӧда, мыйла, торйӧн, ыркыд арлань
кыскис тэнӧ аслад муса Паль.
Эг тай тӧдӧй, олӧмным кыдз пуксяс,
кымын кывбур гижас тэнад ки...
Куим кывйӧн сӧмын ӧд и юксим,
Днепр вуджигӧн аддзысьлім кор ми.
Биын сотчис ставнас Украина,
рытывлань кӧть кывтіс тышлӧн гор.
Кывбур пыдди враг туй вылӧ мина
тэчис сэк поэт да смел сапёр.
Муслункӧд кыдз лӧглун вермӧ овны,
медся бура тӧдмалӧ салдат.
Петін кӧ тэ тайӧ тышысь ловйӧн,
аддзин, кыдзи сувтіс сотчӧм сад.
Тэнсьыд гу выв мутӧ босьта киӧ:
шогӧй некор сьӧлӧмысь оз ям!
Коми мулӧн вӧлін тэ бур пиӧн,
ӧні Украина и Россия —
кисьтӧны пӧсь синва куим мам.