ГЕНЕРАЛ МИКУШЕВ ДА СЫЛӦН
41-ӧд СТРЕЛКӦВӦЙ ДИВИЗИЯ ЙЫЛЫСЬ
БАЛЛАДА

«Тайӧ дивизиялӧн подвигыс абу  ичӧтджык
Брестса геройяс подвигысь...»
Маршал Ф. Голиков.

Рава-Русская кар дорӧ
	сылӧн дивизия сувтіс,
медым тышкасьны врагкӧд
	да тані жӧ, ковмас кӧ, кувны,
ӧти воськов джын чужан му,
	дона му сылы не сетны
да победаӧн, сӧмын победаӧн
	враг вылын петны.
Вит фашистскӧй дивизия
	уськӧдчис асъядор войӧ
ӧти миян дивизия вылӧ сэк
	вир кисьтан бойӧ.
Генерал аслас пиянлы
	бать кодь жӧ стрӧглунӧн шуис:
— Татысь вешйыны миянлы
	некор оз ло мисьтӧм туйыс!
Кызь нёль час сетіс, мӧдарӧ,
	аслас бандитъяслы Гитлер
Рава-Русская кар дорысь биӧн
	став ловъясӧ бритны,
но вит лун да вит вой
	тайӧ кар дорын тышыс нин мунӧ,
генераллысь приказ
	аслас сьӧлӧмысь некод эз вунӧд;
кодӧс пуля нин сконъяліс —
	бара на кыпӧдчӧ сійӧ
да гранатаяс шамыртӧ
	кӧдзавны кутӧм нин киӧн;
вирӧн ойдӧм окоплань жӧ
	кыссьыны зільӧны найӧ,
кодъяс госпиталь вон улын
	корсьны оз кӧсйыны сайӧд;
сӧмын усьӧмъяс куйлӧны
	рытывлань юрнаныс паныд...
Но ӧд усьӧмӧс некор
	да некод оз дивит да янӧд!
Найӧ вӧчисны ставсӧ,
	мый вермисны олігас вӧчны,
налысь подвигсӧ некор
	да некод, кыдз лои, оз стӧчмӧд.
Талун олысьяс! Помнитӧй пыр,
	кутшӧм сьӧкыда шеді
Рава-Русская кар дорын
	зэв ыджыд тайӧ победа:
сэні куйлӧны орччӧн
	да ӧтувъя зэв ыджыд гуын
генерал аслас пиянкӧд
	пӧсь вирӧн киськалӧм муын.