КУСЛЫТӦМ БИ ЙЫЛЫСЬ БАЛЛАДА

Усьӧм войтырлы ӧзтӧма Куслытӧм би,
лӧня сулалам ёртъяскӧд сы бердын ми.
Тані лунвывса вой кырныш бордйысь на сьӧд,
орччӧн веськалӧм мортӧс, кӧть кӧсъян, он тӧд,
но кор вӧрзьылас би кывлӧн алӧй-лӧз борд,
сылань матыстчас, казялам, кок пӧла морт,
кыскас куритчан сійӧ, но истӧг оз корсь,
босьтас киас да шамыртас туй бокысь рос...
Бокӧ вешйыштам ми...
			Бокӧ кежыштӧй ті! —
медым кок пӧла мортысь ог сайӧдӧй би.
Но дзик весьшӧрӧ, тыдалӧ, сы вӧсна тӧжд, —
коктӧм мортӧс оз дӧзмӧдны чукӧрмӧм йӧз;
сылӧн паметяс усьӧмъяс ловъяӧсь пыр,
орччӧн кодъяскӧд оліс да другасис дыр,
ӧти чигарка дас вом дор чишкавліс кор,
эз кӧ кодлӧнкӧ олӧмыс водзтіджык ор...
Тайӧ дасӧдыс — ачыс, а сійӧ эз кув,
ӧні куритчан дінас оз корсь истӧг тув,
ӧзтӧ Куслытӧм бисянь... — Ме том вӧлі сэк...
А ті ме серти томджыкӧсь лоанныд век!..
Сідзкӧ, важ мозыд юкамӧй чигарка пом,
важ моз бара мед тшынасьлас позялӧм вом,
сэсся уськӧдчам водзӧ, кор тшӧктас приказ,
чужан мулӧн пеж врагъясысь нырыштам ляз!..
Карсӧ важӧн нин сывъяліс водз воӧм ун,
ӧтнас кок пӧла морт аслас туйӧд оз мун,
сійӧ виччысьӧ, вуджӧр моз сувтасны кор
орччӧн сы дінӧ тшӧтш ӧкмыс кувлытӧм ёрт.
Важӧн чигарка кусі... Оз сот сылысь ки...

Нэмъяс дзирдалас му весьтын Куслытӧм би!