МАМ ДА ПИ

Миян челядьлысь мый тэ босьтан,
кодыр вӧчасны, кыдз он чайт...
Висьтав, шуасны, ичӧт Кӧсьта,
кытчӧ воштысис тэнад ай?

Зонлӧн ворсантор кисьыс усьӧ,
сувтса кынмылас сылӧн син,
быттьӧ видзчысьтӧг воӧм висьӧм
аддзас поздысьны медбурин.

Керка поскӧдыс ӧдйӧ каяс,
коді абу нин выль да ён.
— Мамӧ, висьтав тэ, кӧні айӧ?.. —
сылань уськӧдчас бӧрдысь зон.

Мамлӧн син дорыс аслас вазяс,
мӧдлысь важӧн нин вевттис сім...
Сылӧн, позсӧ код ассьыс разис,
лоны вермас мӧй мортлӧн ним?

Кыдзи висьтавны пилы сійӧс,
абу шудтӧм мый сылӧн рӧк?
Нэмсӧ корсяс мед ассьыс пиӧс
сё пӧв шудтӧмджык позтӧм кӧк!