* * *

Чер да пила ыдждалісны дыр
зу кодь тшӧкыд пожӧма веж вӧрын,
колис гажтӧм эрд да лыдтӧм мыр
тайӧ ягысь налӧн мунӧм бӧрын.

Вӧлӧма кык кыдз пулӧн бур шуд
орччӧн кольны мыръяс костын ловйӧн,
кӧть эз ӧтчыд вӧрзьыв налӧн вуж,
кудриа веж юрныс эз жӧ ӧтчыд доймыв.

Дерт жӧ, мыжа дом поводтӧм тӧв,
коді кучкис Эжва сайса нюрсянь:
эз ӧд ачыс томджык кыдз пу чӧвт
аслас чойлӧн пельпом вылас юрсӧ.

Збыльысь быттьӧ муніс чорыд бой
тайӧ ягын, миян парма шӧрын...
Сывъясьӧмӧн бӧрдӧны кык чой
дӧваяс моз кольӧм война бӧрын.