МАЛЫШОК

Телевизор дінӧ корӧ
менӧ внучка:
		— Дедӧ, лок
пуксьы ӧдйӧджык ме дорӧ:
петкӧдлӧны «Малышок»!

Ичӧт нывкалы, ме тӧда,
медся муса сійӧ-й эм...
Ачым шойччӧдны тшӧтш мӧда
юрысь дзикӧдз мудзӧм вем.

...Синъяс водзын ош да кӧчиль,
йиысь тэчӧм налӧн чом...
Акань дінысь вӧтлӧ пӧчӧ
ыджыд ньӧрйӧн лӧдз да ном…

Ставыс челядьдырся мойдысь,
коді эз на дзикӧдз вун.
Ӧні ёнджыка на дойдӧ
менӧ аслам пӧрысьлун.

Внучка дзоргӧ восьса вомӧн,
быттьӧ кынмӧма, — оз вӧр,
ме жӧ ӧти улӧс помын,
а вот неуна ог бӧрд.

Мырддьӧй менсьым гора чинъяс,
ӧти кадӧ мырддьӧй шог,
медым бара ӧзъяс синмӧй,
кодыр аддза «Малышок»!