ТШАКА ЗЭР

Енэжтасӧдз бара руа
вӧр дісайса эрд:
быттьӧ пожйысь киссьӧ муӧ
тшакъяс быдтан зэр.

Гортын пукавны ог мӧдӧй,
оз кӧть дзикӧдз коб,
весиг пестерным тшӧтш тӧдӧ,
кытчӧ петӧ гоб.

Ӧшкамӧшка бара сувтлас,
васьыд оз на пот,
сылӧн зарни мегыр увті
тӧвзяс самолёт.

Вӧрысь куш киӧн оз локны,
ог локтӧй и ми:
сьӧлӧм вылад сэки кокни,
кодыр мудзӧ ки.

Озыр вотӧс кыкнан соддзӧн
пестер тырыд сӧвт,
воас тшак сёян поводдя —
сизим тӧлысь тӧв!