ИДОЛЪЯСМиян прадедъяс идоллы эскисны важӧн, налы быть вӧлі колӧ, мед ыдждаліс ен. Вӧлі сы нимын ставыс: и шудыс, и гажыс, енсянь отсӧгӧн врагъяскӧд нуисны вен. Локтіс Пермскӧй Степан, налысь идолсӧ сотіс, коми сиктъясын вичкояс кыпӧдіс тыр. Кодлӧн сьӧлӧмыс скӧрысла сы вылӧ потіс, сійӧ эскыны выль енлы эз кӧсйы дыр. Дедъяс юрбитны кутісны выль ногӧн, чӧла зэвтны, вичкоас сулаліг, кокъяссьыс сӧн. Парма эрдъясті гуляйтысь-шӧйталысь тӧлыс ылӧдз паськӧдліс жыннянлысь ылӧдчан звӧн. Аслам бать-мамкӧд котралі вичкоас ме тшӧтш, кодыр кынӧмӧй пӧт вӧлі, эг ёна вись. Гортын синмӧс кӧ курдӧдліс тшыналысь пеша, еджыд вичкоын дзирдаліс кодзув кодь сись. Тайӧ кодзулыс, жыннянлӧн бувгӧмыс мый ли, гашкӧ, бур енмыс ачыс да сылӧн пророк, ставыс, — дзугйӧ моз лэбачӧс мый коркӧ кыйлӧ, — челядь сьӧлӧмысь пальӧдліс кӧсйӧм и шог. Важӧн некутшӧм енлы ме ог ӧд нин эскы, но и вичкояс жуглыны лёклун эг видз. Сійӧ идол и эм, миян керӧсъяс весьтысь коді бырӧдіс дедъясӧн чужтылӧм мич. Гашкӧ, ӧні на пыр сійӧ ньӧти оз гӧрдӧд, кодыр паметяс ловзяс, мый жугӧдліс сэк... Колӧ миянлы сы пыдди курыда бӧрдны, босьтны лов вылӧ мукӧдлысь збыль вӧчӧм грек.
