ВОЙВЫВСА МОЙД

Кык гӧра костын бузгӧ шор,
сӧдз синва кодь жӧ рӧмыс валӧн,
ті сыкӧд верманныд, кӧть кор,
пыр паныд лоны дзор Уралын.

Мед турӧб петас, усяс лым
да ставсӧ тыртас гӧра йылӧдз,
а шорыс, быттьӧ збыльысь пым,
и сэки помся мыйкӧ сьылӧ.
Эг ӧти вой, эг ӧти лун
ме туйын пӧсьӧс коркӧ кисьтлы,
и тайӧ шор дорас оз вун
дзор вӧралысьлӧн гажтӧм висьтыс.
...Ураллӧн быдмисны кык пи —
збой Тӧв-Поз-Из да Сабля гӧра,
но регыд воис сэтшӧм пӧра,
кор бать поз найӧс эз нин йит.

А мыжа вӧлі ӧти ныв —
и, дерт жӧ, вильыш Манарага:
ӧд мича нывлӧн мелі кыв
и вокӧс воклы вӧчӧ врагӧн!

Сьӧд лӧглун сьӧлӧмъяссьыс кор
и налӧн синъясас нин вуджис,
сэк весиг изйысь быдса шор
пӧсь синва кывтны тадзи чужис.