СЬӦД УДЖЛЫ ОШКАН КЫВСосъястӧ вылӧдз пуджӧй, босьтчанныд кодыр уджӧ, медым кӧть сійӧ сьӧкыд, медым кӧть сійӧ сьӧд. Велӧдны, дерт, эг мӧд, кӧрсӧ кӧ тшӧтш эг тӧд... Мудзлунӧс ӧні кыла: ректывлі коркӧ тыла, ачымӧс сэк эг видз, вӧдиті му да видз; ытшкыны сюрлі, гӧрны, кок йылысь весиг пӧрны, — код тӧдас, кымын кер пӧрӧдіс менам чер. Мыш вылысь пӧсь эз бырлы, чужӧмӧй сирӧн тырлі, сьӧкыдджык, сьӧдджык удж бӧрйыны сэк эг куж. Сьӧдджык... А мыйӧн сьӧдджык, кодлы нӧ сійӧ рӧдджык? Ас вылысь ме эг чайт аддзыны унджык няйт. Эм уджыд кокни, еджыд... Кодлӧнкӧ петӧ вежыс: олӧ пӧ, кыдзи гӧсть, некор оз кисьтлы пӧсь... Колис, дерт, ӧні ылӧ дедъясӧн вӧчлӧм тыла, тшыглунысь оз нин пов кыпыда олысь лов. Сӧмын ме ог и эскы сылы, код пӧсьлы места мыш вылас оз нин сет, мед сэтчӧ гӧрб оз пет! Сьӧд уджтӧг му оз вежӧд, еджыдыс оз ло еджыд, кералӧм ягын бӧр некор оз быдмы вӧр! Сідзкӧ, ті бура олӧй, сьӧд уджысь энӧ полӧй!
