НЯНЬ ДА СОВ

I

Тайӧс помнитны зэв ёна
кыдзи нӧ оз ков,
коми мортлы кутшӧм дона
вӧвлі нянь да сов.
Коркӧ ӧмӧй сійӧ кужліс
шуны — бара пӧт:
нэмсӧ корсис сьӧкыд уджӧн
аслыс кынӧмпӧт.
Тыла вылӧ кӧть и кӧдзліс
дӧмас пасьта му,
зэв водз воӧм арся кӧдзыд
сотліс сылысь сю.
Сэсся кӧть нин вӧлі йирӧ
юрсӧ сылы сюй...
Кольлі зэв ылі Сибирӧ
ӧти сьӧкыд туй.
Жалитліс кӧ, ӧтнас парма,
сійӧ ӧтнас нач,
козин пыдди вӧзйис арнас
вотӧскӧд тшӧтш кач.
Олӧмчӧжся татшӧм тышын
ӧдва кыскис лов...
Сотліс сылысь дӧрӧм мышсӧ
пӧсьнас лэччысь сов.

II

Ӧні югыд шонді улын
мӧд ног олӧ морт.
Кылан, кыдзи садьмӧм пулӧн
потӧ воссян кор!
Ылӧ муӧ шог оз вӧтлы
сэтысь корсьны нянь,
ассьыс шомӧс вермӧ кӧтны
кыдтӧм пызьӧн ань.
Паськыд ыбъяс вылын кылӧ
сё мотора гор,
ӧні некодӧс оз ылӧд
важӧн ковтӧм бор.
Ветлӧ слава орччӧн сыкӧд, —
кыдзи тувсов гым! —
Коді юкӧ тайӧ зыкас
кушӧдз ассьыс вын,
садьмӧ водз да водӧ сёрӧн,
лишнӧй час оз узь,
медым сыӧн тэчӧм сёрӧм
муртавны эн судз.
Паметь вӧрзьӧдлас да сійӧн,
гашкӧ, лолас рам...
Оз нин тӧдны сылӧн пиян
курыд кыксё грамм!

III

Сэсся некор татшӧм кадыс
оз жӧ нин мед лок!..
Но эз чуж на миян радын
зэв тӧдысь пророк...
Муслун дедъяснымлӧн колӧ
ставсӧ вӧчны сідз,
медым лышкыд мам моз оліс
миян му и видз.
Тадзи радейттӧгыд муыд
озырлун оз сет,
ӧти-кык шеп пыдди, шуам,
ӧкмыс сьӧкыд шеп.
Ыджыд вердысь сійӧ миян,
сылы он тӧд дон.
Сідзкӧ, лелькуйт жӧ тэ сійӧс,
сиктса удал зон!
Лысва вылын тэрмась ыбӧ
нуны сьыланкыв
асъядор,
кор кыа лыбӧ,
кыдзи зарни тыв.
Сиктса мырсьысьлӧн бур уджысь
он кӧ ньӧти пов, —
шуны быдӧн тэныд кужас:
— Шуда нянь да сов!..