ТАЛУН ДЗЕБӦНЫ МОРТӦСТалун дзебӧны мортӧс... Да оз ыджыд чинъяса мортӧс, Катафалк вылӧ сылысь Оз лэптыны кокньыдик горт, — Сійӧс босьтісны ки вылас Ланьтӧмӧн восьлалысь ёртъяс, Кыдзи лэптӧны му вылысь Лэбачлысь чегъясьӧм борд. Бӧрдӧ ӧтнас оркестр Да и сійӧ оз кладбище дорӧдз (Вывті уна пӧ ворсӧмысь Босьтасны мынтысян дон!), Сӧмын шонділысь син пӧвсӧ Енэжысь некод оз орӧд, — Сійӧ видзӧдӧ вылісянь Пыр ӧзйысь ӧгыр кодь дон. Сувтлӧй... Кодӧс да мыйла ме Туй вылысь, сувтӧдны кӧсъя? Кувсьӧм войтырӧс эрд вылын, Кажитчӧ, некод оз видз, Кынмӧм сьӧлӧмыс некор нин Мӧдысь оз вӧрзьы да ӧзйы, Сійӧс ловзьӧдны некутшӧм вын Да лекарство оз сидз. Коркӧ кувся и ме... Абу ылын нин чергӧдчан кадыс, Кодыр сывъялас ачымӧс Кӧдзыда лолалысь му. Олӧм помасьӧ сідз, Кыдзи войтырлӧн вежӧдысь садйысь Усьӧ кок йывсьыс косьмӧм Да важӧн нин нёровтчӧм пу. Мыйла та йылысь сёрнисӧ Водзвыв да виччысьтӧг пана, Бура кыла на сьӧлӧмлысь Неуна збоялан гор... Кувсис, — тӧданныд он? — Муніс ми дінысь век кежлӧ талун, Гашкӧ, зэв уна йӧз лыдысь Медыджыд сьӧлӧма морт. Сылы чинъяс эз ковлыны, Тӧдчӧдны асьсӧ эз кӧсйыв, Ыджыд пенсия некодлысь Асланьыс мырдӧн эз юк. Ӧти войтӧдз став вын, Аслас сьӧлӧмлысь медбӧръя пӧсьлун Сійӧ сетіс дзик ӧтнадлы тэн, Миян Рӧдина-му! Сьӧрсьыс некод эз нулы на Весигтӧ кӧдзалӧм ловсӧ, Но и му вылас, овлывлӧ, Ыджыд оз кольлывлы пас, Сӧмын, медтыкӧ, йӧз серти Ёнджыка кокниа овсис Да мед йӧз серти сёрӧнджык Матыстчис медбӧръя час. Татшӧм олӧмтӧ зывӧктіс морт, Кодӧс колльӧдам талун: Тышын пыр вӧлі водзын, И удж вылӧ корны эз ков, Няйттӧ нимтыны няйтӧн Пыр дась вӧлі медыджыд залын, И начальниклысь дышлунсӧ Бертыштны кывнас эз пов. Татшӧм мортыслы памятник эськӧ... Но изйыс оз тырмы, Частӧ видзам ми сійӧс Ог колана ногӧн, а сідз... Югыд олӧмӧ петтӧдзным, Тыдалӧ-тыдалӧ, дыр на Ми ог велалӧй аддзыны Войтырлысь медыджыд мич!
