* * *

Кутшӧм паськыд тэ, Россия,
Миян чужан му:
Мича каръяс, зарни бияс,
Лыдтӧм шор да ю!

Коймӧд лун нин водзӧ нуӧ
Кӧртысь дорӧм вӧв.
Миян бӧрся сӧмын пуӧ
Лэчыдалысь тӧв.
Пуяс котӧртӧны воча,
Нюжӧдӧны ки.
Тӧда комиӧн и рочӧн
Дзик быд турун сі.
Сьӧлӧм пытшкын ловйӧн кольӧ
Налы вӧчлӧм дой.
...Харьков, Курск да Гуляй-поле,
Уна сьӧкыд бой.
Югыд асыв помтӧм эрдын,
Лысваасьӧ му.
Ӧтнас ланьтіс кӧрт туй бердӧ
Ыджыд братскӧй гу.
Тані, пӧрысь тополь улын,
Узьӧ коми зон.
Ог, ог тӧд ме тайӧ мулысь,
Кыдзи мамлысь, дон!