* * *

Лолала Сочи сынӧдӧн,
Морелысь кывза горсӧ.
Юр вылӧ чӧла гылӧдӧ
Тунг ассьыс косьмӧм корсӧ.

Томджыкъяс орччӧн йӧктӧны,
Вӧрӧны гажа бияс.
Мый ӧні тадзи ӧктӧны
Пемыдас дзугсьӧм кияс?

Войын став шыяс меліӧсь,
Быд шы кӧть аслыд курышт!
Енэжас тӧлысь келӧма,
Ӧшйӧма увлань юрӧн.

Кыкӧн ми сыкӧд ӧтдорӧсь,
Кыкнанным ӧткодь дзорӧсь,
Некор ог мунӧй мӧд дорӧ,
Некодлысь син ог ёрӧй;

Лолалам Сочи сынӧдӧн,
Морелысь кывзам горсӧ...
Му вылын ставыс кылалӧ,
Выль томлун сӧвмӧ-ворсӧ!