КӦНІ ГАЖА ПӦРА

Кӧні гажа пӧра,
Менам том, бур кадӧй?
Отравиті сійӧс
Сирва курыд ядӧн.
Ог тӧд, кӧні помӧй,
Матын али ылын...
Синъяс пытшкысь сӧдзлун
Вина пытшкын сыліс.
Кӧні шудӧй? Пемыд,
Шогӧй вӧрӧ пыдын.
Му вылын-ӧ? Кабакын?
Нинӧмтор оз тыдав.
Кияс нюжӧда и со
Бура кыла ставсӧ:
Мунам, вӧвъяс, додь да лым,
Мунам кыддза раскӧд.
— Эй, ямщик! Ми надзӧн тадз?
Чайта, абу полысь.
Татшӧминті абу жаль
Пыркӧдыштны лолӧс.
А ямщик мен кайтӧ пыр:
— Татшӧм омӧль туйӧд?
Турӧб дырйи вӧвъястӧ
Пӧсьӧдны оз туй ӧд.
— Тэ, ямщик, тай вӧлӧм трус!
Вайлы, мый сэн узян? —
Швичкӧ менам киын плеть
Вӧвъяслӧн мыш кузя.
Вӧвъяс лэбӧны, кыдз тӧв,
Ӧвтчӧ налӧн бурси,
Друг сэн г-гып, и веськыда
Тола пиӧ уси.
Чеччи, аддза... Вӧвъяс кӧн?
Вошӧмаӧсь? Мыйла?..
Койка вылын, кӧртасьӧм,
Больничаын куйла.
Ме ог аддзы вутшкӧсь туй,
Некӧн абу вӧвъяс.
Ва кӧртӧдӧн нӧйта ме
Ассьым чорыд крӧвать.
Часі вылын, усъяс моз,
Мунӧны кык стрелка.
Гӧгралӧны ме дорын
Некымын сиделка.
Гӧгралӧны, горзӧны:
— Эй тэ, зарни юра,
Отравитін ачыд тэ
Асьтӧ тайӧ курнад.
Ми ог тӧдӧй тэнсьыд пом,
Матын али ылын.
Лӧзов мича синъястӧ
Кабакын тэ сывдін.