* * *

Лишалан кӧпейка зептын абу,
Да и ёна шогсьыны оз ков:
Бара важ моз кыссьӧ гулыд ягӧ
Чужан муысь торъявлытӧм лов.

Озырлуныс менам — асъя кыа,
Тувсов енэж, сӧстӧм ю да шор.
Шуда сійӧ, коді медводз кылӧ,
Кыдзи садьмӧ пуяслӧн нюдз кор.

Кыаыслы воча бара пета,
Вынъяс серти корся аслым удж.
Эг ӧд ло и неыджыд поэтӧн,
Радейтны кӧ олӧмсӧ эг куж.

Коркӧ, дерт жӧ, пӧрысьма да кула,
Нинӧм тасдор югыдысь ог ну,
Медым сӧмын пыр веж пожӧм улӧ
Козьналасны ёртъяс меным гу.

Вывті водз на ковтӧм шогсӧ пӧжны, —
Абу сэтшӧм миян гора нэм!
Бур, кор мича, быравлытӧм тӧждлун
Сьӧлӧмас и юрас мортлӧн эм.