ПЕЧОРА ВЕСЬТЫН АРСЯ ВОЙ

Татшӧм серпассӧ некысь он аддзыв,
Пыжӧн нэмтӧ кӧть ва вывті кывт:
Тӧлысь вольсаліс зарниа раддзысь
Лӧньӧм ю вомӧн дзирдалан тыв.

Арся вой вывті ыркыд да гора,
Чужтӧ сьӧлӧмын радлун и шог.
Эг кӧ радейт ме тэнӧ, Печора,
Кӧдзыд ар помын эг эськӧ лок.

Тӧлысь тэрмасьтӧг енэжті уйӧ,
Джуджыд яг сайӧ дыр на оз нёр.
Кыла, кисьтӧны пӧрччӧдӧм пуяс
Ланьтӧм ва вылӧ медбӧръя кор.

Ылыс мореӧдз пыр эськӧ кывті,
Эг корсь аслым ме ыджыдджык шуд,
Гашкӧ, шуасны, веськалі вывті
Меным кокни да кыв куттӧм удж!

Йирмӧг вочасӧн сьӧлӧмӧдз йиджӧ...
Мыйла коньӧрӧс ньӧти ог видз?
Коркӧ вермас-ӧ восьтыны гижӧд
Тайӧ тӧлыся войыслысь мич!