МЕДБӦРЪЯ СТАРӦВЕРВажӧн сынасьтӧм, дзугсьӧм тошка, Синмас кынмӧма кӧдзыд сер. Аддза, пукалӧ пӧрысь ош кодь, Гашкӧ, медбӧръя старӧвер. Важ пӧчинӧкын сійӧ ӧтнас Видзӧ енмыслысь ловсӧ тшӧтш Да пыр тіралӧ, мед эз сӧтны Сімӧм ведраысь сімӧм кӧш. Кутны пиянсӧ вын эз тырмы: Найӧ корсисны мича туй... Лэчыд лӧглунысь киыс сырмӧ, Коді ньӧтчыд эз гӧлӧсуйт. Шуштӧм важыс пыр сылы колӧ, Кодыр морт оліс, кыдзи зверь, Но эз ен помысь чуктӧм олӧм Талун сывъяліс войвыв эрд. Курыд мӧвпъясысь век жӧ доймӧ Юрас кӧдзавны кутӧм вем. Кытчӧ воштіс да кыдзи тойліс Мортлы ӧтчыдысь сетлӧм нэм! Регыд, регыд нин тыртӧм синмас Сылы видзӧдлас шуштӧм вой... Коли сӧмын нин ӧти синва, Ӧти неыджыд, курыд войт.
