ТУРӦБ

Но и турӧб, но и турӧб, —
Лым и лым!
Коймӧд лун нин помся дурӧ
Лешак вын.
Еджыд толаясӧ суніс
Каравом.
Тані, — оз ӧд прӧста шуны! —
Мулӧн пом.
Но ме турӧб пырыс кыла
Тӧдса гор:
Кӧдзыд море весьтын сьылӧ
Миян борд.
Кӧть и воддза кодь жӧ луныс
Лои йӧй,
Ассьыс служба сюся нуӧ
Часӧвӧй.
Чӧла ланьтӧма ракета,
Но оз узь...
Нолы, полюс сайысь петав,
Ышмӧм сюзь!
Кортӧм гӧстьлы вичмас пайыс —
Биа шер!
Куйлӧ сизим томан сайын
Войвыв эрд.