ЭЖВА КАРЫСЬ ПИСЬМӦ

Пӧдарит меным сэтшӧм дзоридз,
Кодӧс козьналӧ югыд май.
Кӧсъян, видз вылысь сійӧс орӧд,
Либӧ ыб вылысь корсь да вай.

Эжва карын ме ӧні ола,
Карын, овмӧдчис кӧні шуд.
Татчӧ ӧтчыд кӧ коркӧ волан,
Сыкӧд янсавны он нин куж.

Быд лун пасйӧны тані свадьба,
Новосёллӧн оз куслыв нюм.
Удж и слава тэ татысь аддзан,
Сё машиналысь кылан шум.

Важ баракъяслӧн шуштӧм серпас
Тайӧ карӧ, кӧть корсь, оз тӧр.
Кӧртӧн дорӧм бетонысь керка
Бара сувтіс, кӧн вӧлі вӧр.

Тайӧ карӧ ме тэнӧ кора,
Тырмас юкны быд уджлысь пай.
Еджыд син лыска тувсов дзоридз,
Ӧти дзоридз тэ сьӧрсьыд вай.