ПОСЁЛОКЫН ВОЙ

Сувтісны вагонъяс ӧти радӧ,
Локтӧны мудз зонъяс стройотрядысь,
Мыссьӧны да вӧччӧны, кыдз колӧ,
Тані налӧн удж и тані олӧм.
Ставыс сідз,
		кыдз овлывлӧ походын:
Ӧти лыддьысьӧ, а мӧд нин водӧ.
Коймӧд, гашкӧ, муса нывлы гижӧд
Вуктылсянь пӧсь чолӧмъясӧн гижӧ.
Аски зэв водз кыпӧдчасны зонъяс,
Эновтасны ассьыныс вагонъяс,
Бара туйӧ,
		бара пемыд вӧрӧ,
Водзті кӧні шӧйтіс ӧтнас йӧра...
Збыльысь подвиг ӧні тані чужӧ —
Нюръяс вомӧн газопровод вуджӧ,
Биа югӧр регыд кутас койны
Му пасьтала миян чужан Войвыв.
Ӧні вой...
И морт, и парма узьӧ,
Весиг парма кылӧ ассьыс мудзӧм,
Музыкаӧн баййӧдлӧ эфирыс...
Эм-ӧ татшӧм мичлун ыджыд мирын!