ВУКТЫЛ

Некодӧс эз вердлывлы,
Некодӧс эз юктавлы,
Кывтіс парма-эрд вывті
Енмӧн ёрӧм Вуктылным.

Гашкӧ, ӧти вӧралысь
Татчӧ ӧтчыд кежаліс,
Джуджыд Урал гӧралы
Сійӧ сӧмын вежаліс.

Шуштӧмлуннас повзьӧдліс
Пӧткаӧс и войтырӧс.
Сьӧд ном сӧмын ловзьыліс
Тайӧ помтӧм койт вылас.

Бӧрӧ нэмъяс кывтісны
Радлунӧн да синваӧн,
Налӧн бордъяс-сывъясыс
Вуктылӧдз эз инмывны.

Сылысь эрдсӧ вуджа ме
Талун вездеход вылын,
Вышкаяслӧн вуджӧръяс
Ёльяс вомӧн водісны.

Вӧвлӧмторсӧ орӧда
Зэв дыр кынмӧм пу вылысь...
Вуктыл нимысь гораджык
Абу, гашкӧ, му вылын.

Ӧти шонді миянӧс
Гӧлиника шонтыліс.
Шуда йӧзлӧн пиянлы —
Вуктыллӧн выль шондіыс!