МЕДБӦРЪЯ ЧӦВЛУН

Куржӧвитӧм кыдз пуяс сулалӧны чӧла,
Ӧшйӧма быд чаль вылӧ эзысь прӧшви-кӧв.
Еджыд эшкын улӧ пырӧм Вуктыл пӧлӧн
Водзӧ менӧ нуӧ дыша рӧдтысь вӧв.
Вӧр-ва лӧня узьӧ, нинӧм дзик оз вӧрзьы,
Дзуртӧ сӧмын, кыла, додь сюв улын юж.
Колльӧдчысь, эн чӧв ов!
				Сьыланкывйӧн вӧрзьӧд,
Мича мойд кӧть висьтав, сьывны кӧ он куж.
Гашкӧ, збыльысь бурджык лӧня вуджны вӧлӧк,
Медбӧръяысь кывны, мый сэтшӧмыс чӧв...
Швичкӧ вӧжжи помыс:
			— Нолтӧсь, дышмӧм ӧлук,
Ӧтчыдысь кӧть воськовтӧ тэрыбджыка чӧвт!
Колльӧдчысьӧс асьсӧ топӧдӧ нин йирмӧг,
Кӧдзыдсьыс оз мезды шоныд ыж ку пась.
— Пӧрысь мортыд — пӧрысь... Сьӧлӧмӧй
							нин виртӧм...
А ӧд коркӧ вӧвлі... Тэ нӧ абу тась?..
— Абу, — шуа.
— Аддза... Сідзкӧ, эскан налы,
Кӧдзыд муысь кодъяс корсьӧны тась би?
Енмыслы нӧ мыйла колӧ сувтны паныд?
Му пытшкӧсса битӧг... пыр тай овлім ми...
Со мый, вӧлӧм, дедлысь муссӧ талун зыртӧ,
Гӧгӧрвоа, коді кутӧ мекӧд туй!
Ыджыд зыкӧ талун колльӧдчыськӧд пырны
Мӧд енмыдлы эскысьыдлы дерт жӧ нин оз туй...
— Аслам менам пиӧй на дінӧ жӧ пышйис...
Заводитлі кутны... Но эз тырмы вын... —
Чужӧм вывсьыс дедӧ синва войтсӧ чышкис.
Синва? Гашкӧ, синва... Гашкӧ, вӧлі лым...
Парма весьтті кывтіс чарла джынъя тӧлысь.
Ӧшаліс быд пу вылын эзысь прошви-кӧв.
Еджыд эшкын улӧ пырӧм Вуктыл пӧлӧн
Медбӧръяысь ыдждаліс нэмӧвӧйся чӧв.