* * *

Тэ юалан: мыйла ме чӧла
Да зумыша нюмъяла век,
Пыр видзӧда бокӧ —
Ог тэлань,
И вунӧда став йылысь сэк?
Тэ юалан —
Мыйла ме торйӧн
Да веськыда ветла йӧз дорад?
Мый шуны тэд, ичӧтик нывка,
Тэ мича и вывті на том,
И сӧстӧм на нэриник мывкыд.
Тӧд — сьӧлӧмӧй менам нин шом.
Ме мӧвпъясӧн ола.
И талун, и аски
Мен радлун оз вайны нин гашкӧ,
Ме тӧрытӧн ола —
Кор вӧлі любовь,
Кор муслунӧн тырлывліс лов,
Кор ӧзйывліс яр биӧн сьӧлӧм,
Но тэ кодь жӧ нывкалӧн вӧлӧм 
Ме дінӧдз тай сьӧлӧмыс йи...
И морӧсысь кусі яр би...