КЫВБУРДегов рытӧ кыа кусӧ, Машлӧн коклябӧрыс лудӧ: Локтӧ пароходӧн мусук — Вайӧ запаньысь выль гудӧк. ________ Чуньяс улын гудӧк тэрыб, Ливъякылӧ морт кыв горӧн: “Видза коляд, багыр-черӧй, Локта гортӧ мусук дорӧ”. Кык яг костын, Эжва пӧлӧн Кылӧ шыасис зэв гажа: “Муса Машӧ, муса вӧлін, Ӧні нӧшта муса Машӧ”. Мый нӧ, Степан. Эн тай весь ӧд Вӧв тэ медся бур ударник! Йӧкты, Степан! Вывті лӧсьыд! Джоджыс кузя сяркнит-шаркнит. Гажа шытӧлыс оз йӧрмы — Юргӧ йӧлӧгаӧн ылӧ. Дивуйтчыныыс оз вермы Ывлавылыс ставыс вылӧ. Гудӧк гажлӧн вынйӧр содӧ, Кок шы тшӧктӧ, нӧшта тшӧктӧ... Быттьӧ тшӧтш и пароходыс Кӧльӧсаяс вылын йӧктӧ. ________ Тювгӧ пароход ю шӧрӧд, Гыыс нюлӧ берег дорсӧ. Машӧ лэччӧ вадор йӧрӧд, Чужӧмбанас нюмыс ворсӧ.
