КОРКӦ ВӦВЛӦМА

Коркӧ вӧвлӧма тані лагерь —
Мыжтӧм войтырлы рай и ад.
Пыр на казьтылӧ пожӧм ягыс
Миян му вылӧ волӧм кад.

Ме эг вузавлы ассьым ёртӧс,
Тӧдтӧм мамлы эг вӧчлы дой,
Гашкӧ, сы вӧсна сэтшӧм горша
Гусьӧн ньылала синва войт.

Усьӧ лым пӧрӧм вахта вылӧ,
Туйсӧ вуджиг кӧрт жель оз кыр.
Шуда челядь
		со керӧс йылӧ
Талун вӧчӧны йиа кыр.

Некод некодӧс оз нин мыжав,
Пиыс батьсӧ оз сэсся ёр...
Сӧмын пыр,
	кыдзи пӧльтчӧм грыжа,
Обелиск дорын кынмӧ морт.

Оз нин повзьӧдлы...
Муса пиян,
Ми кодь шондіыс кӧні эм!
Ӧтнас Пугалӧ пыдди сійӧ,
Медым кынмыны кутас нэм.