МӦДЛЫ МЕД ТЭСЯНЬ ШОНЫД

Унаысь тэнӧ дойдлісны,
Кодӧскӧ дойдлін ачыд,
Биӧн кор тэнад ойдлывлӧ
Морӧсад сьӧлӧм-пачыд.
Тӧда, и кута эскыны:
Мортӧс оз дорйы рангыс...
Прӧстӧ ӧд тадзи эз кыны, —
Некод пӧ абу ангел!
Кужны и колӧ шогсьыны,
Ёртлы кор дойыс инмас.
Мыйла нӧ яндам ноксигас
Уськӧдны эзысь синва?
Выль йӧз кор туйӧ петасны, —
Выль олӧм воас, чайта.
Миянлы ӧні весавны
Важ нэмлысь кольӧм няйтсӧ.
Быдӧнлы ыджыд колантор
Сӧстӧм да мича лолыд.
Му вылас ӧтчыд олан кор,
Мӧдлы мед тэсянь шоныд!