ЭН ЮАСЬ

Эн юась тэ сійӧс,
Кыдз меным тан овсьӧ,
Кор войвывса ниа
Веж лысъяснас ловзьӧ,
Кор потӧ багульник
Да кольмӧдӧ юртӧ,
Кор кынмӧ да ульдӧ,
Быд шор весьтын дзуртӧ,
Кор воссьӧны юяс
Да садьмӧны тыяс...
Тэ менсьым эн юась,
Ме тэныд ог шыась!
Эн юась тэ сійӧс,
Мый мортӧс пыр дойдӧ...
А Эжваным миян,
Дерт, бара нин ойдӧ:
Том зонъяслысь сёрни
Выль запаньысь кыла.
Ме ӧтнам тай сёрми,
Ме ӧтнам тай ылын...
О, чер эськӧ киӧ
Да кузь зібъя багыр! —
И ме вӧвлі пиӧн
Веж раслӧн, веж яглӧн,
И мый сэтшӧм муса
Эм вӧр-валӧн шыас,
Тэ некор эн юась,
Ме тэныд ог шыась!