* * *

Ме унаысь ылавлі вӧрӧ
И тундраын зэв ёна мудзлі,
Лӧнь ёль дорын,
Егыръяс шӧрын
Сьӧд енэжлӧн вон улын узьлі.

Эг норасьлы сэк, чужан муӧй,
Кӧть вӧвлі и гажтӧм, и кӧдзыд.
Ӧд кыйсьысьлы войвывса юыд
Быд юысь на кажитчӧ сӧдзджык.

Веж пармаыс быдтіс да видзис
И вичмӧдліс миянлы пӧтӧс,
Но олӧмлысь шудсӧ да мичсӧ
Эг аддзывлӧй збыльысьсӧ вӧтӧн.

Ме ӧні нин велалі сьывны
Да восьлавны му вывті нюмӧн.
Быд кыйсьысьлы выль сьыланкывъяс
Дась дон босьттӧг козьнавны нумӧн.

Ог мудерлун петкӧдлы ошлысь,
Ог Яг-мортӧс ен нимӧн даръяв, —
Ме быд кывйӧн чужан му ошка, —
Выль туйяс,
		выль сиктъяс,
				выль каръяс.

А вӧрын кӧ суӧдас войыс, —
Оз бипурӧн енэжыс югды, —
Ӧд став Коми му пасьта койны
Сё шонділӧн югӧр оз дугдыв.

Вот та вӧсна повзьытӧг мунан
Быд сьӧкыдлун ӧдйӧджык венны.
... О, кодлӧн нӧ куим кыв вунас, —
Октябрь, рӧднӧй Партия, Ленин!