ЛЫЖИ ВЫЛЫН

Ыркыд сынӧднас
Некор он пӧтлы,
Кӧть и вом тырнад
Апйӧдлан-юан.
Оз ӧд лыжи да бедь
Тэнӧ вӧтлы, —
Лэбач борд
Небыд лым вывті нуӧ.

Унзіль пуяслысь
Вӧтсӧ эн падмӧд:
Аддзан, туктаӧ
Дзебисны юрсӧ.
Весиг лов шыысь
Кыдз пуыс садьмӧ,
Быттьӧ кӧр
Ассьыс кыпӧдӧ юрсӧ.

Медым кӧдзыдыс
Чужӧмтӧ сотӧ,
Сійӧс некод дзик
Ӧні оз мыжав.
Эз мӧй шондіыс тшӧтш
Микӧд котӧрт,
Сылӧн вӧлі кӧ
Зарниа лыжи?

Чужан войвывтӧ
Радейтӧ сійӧ,
Коді некор оз сӧр
Гора кылӧн...
Сӧмын сьӧлӧмад
Ыпъялысь биыс
Аслас пӧсьлунӧн
Некор оз ылӧд.

Пӧльтӧй-шутьлялӧй,
Турӧбъяс, бара,
Ещӧ кыпыдджык
Ті вӧсна ловлы.
Со и мен эськӧ
Этатшӧм яра
Тайӧ му вылын
Нэм помӧдз овны!