ЯРЕНЬГА ДІНЫН

Геологъяс петісны нюрысь
Да яг вылӧ зэвтісны вон,
И кодлыкӧ виччысьтӧг сюри
Сісь мыр бердысь тыртӧм патрон.

Эз кыйсьысьяс шыбитны сійӧс,
Мед ыргӧнсӧ вильӧдіс сім.
Ме босьтлі тшӧтш аддзӧмтор киӧ
Да лыдди «Британия» ним.

И паметьын бара сэк чужис,
Мый вунӧдны некор оз ков:
Тат Удора вӧлӧксӧ вуджис
Английскӧй руд френча Орлов.

Эз дзоридзӧн сійӧ сэк мичмӧд
Да лелькуйт гӧль войтырлысь му.
И медлёк бандитлы моз вичмис
Кык воськолысь векниджык гу.

А вӧр весьтын дзирдалӧ шонді,
Выль сьыланкыв сьылӧ быд шор,
И Яреньга ю боксӧ пондіс
Кӧрт вӧвъяслӧн шызьӧдны гор.

О, кутшӧм тэ вына да шуда,
Выль пармаын бордъяссьӧм пи!
Ӧд некод нин ӧні оз нюжӧд
Сӧдз Эжвалань ассьыс пеж ки.

Ми радейтам ягвывса сирӧн
Да бур тшынӧн йиджтысьӧм вон.
Мед нэм куйлас Яреньга йирын
Сісь мыр бердысь аддзӧм патрон.