ЧУМЫН

Шонді вӧтліс кыа-бинас
Тундра весьтысь вой,
Но оз вешйы книга дінысь
Кӧр видзысьлӧн чой.

Ӧзйӧ лампа...
Муса Ленин
Оз дзеб долыд нюм:
Чумысь аддзӧм серпас веніс
Сылысь мукӧд дум.

Нывлӧн сідз жӧ пуӧ мӧвпыс...
Сійӧ аддзис висьт,
Кодлысь Ленин уна пӧв жӧ
Лыддьыліс быд лист,
Сэсся йӧз вӧснаыс думнас
Эз узь уна вой.

...Аски велӧдчыны мунӧ
Кӧр видзысьлӧн чой.

Кыа паськаліс нин ылӧ,
Сувтіс мича лун.
Книга дінас ичӧт нылӧс
Личкис шуда ун.

Ӧзйӧ лампа...
Коді кутас
Прӧстӧ видзны би?
Восьса книгасӧ пыр кутӧ
Ичӧт нывлӧн ки.

Муса нылӧй! Кытчӧ нуӧ
Тэнӧ аслад борд?
Тэныд шуда туй пыр сиӧ
Муса Ленин ёрт.