ВӦРСА МОЙД

Веж ягъяс вывті шӧйтім ми
Да вуджим лыдтӧм нюр,
Пыр, чайтім, налӧн некор дзик
Пом-пыдӧсыс оз сюр.
Сёр рытын Йӧртӧм берег дор
Друг аддзис миян син.
Вӧр керка дорын пӧрысь морт
Дзик ӧтнас пестіс би.
Тшӧтш перйим сэк походнӧй пӧрт,
Да зіля ӧшим тшӧтш.
Ӧд вӧрын быдсӧн дона ёрт,
Ӧд вӧрын быдсӧн гӧсть!
Сьӧд борднас вевттис кырныш-вой
И вӧр, и ва, и му.
Но мыйла, мыйла югыд ёль
Оз аддзы чӧскыд ун?
Эз вуджлы коді парма-рас,
Дерт, висьтавны оз куж,
Кыдз шувгӧ унмӧ вӧйӧм яг,
Кыдз варовитӧ ю.
Эн волы пармаӧ кӧ тэ,
Эн колльӧд сэні вой, —
Он тӧд, кыдз еджыд тошка дед
Пыр каттьӧ ассьыс мойд.
Ӧд челядь дырсянь быдӧн ми —
И тэ, и ме, и вок —
Быд мойдлысь видзам ыджыд мич,
Кыдз первойя любов.
И коді выльысь абу рад
Тан пальӧдны том ун!
Ӧд муса асланым том кад,
Почётын — пӧрысьлун.
— Эк, зонъяс, — сёрни паніс дед, —
Ен сетіс мортлы кыв,
Но эг на кывлы некор ме
Мӧд сэтшӧм сьыланкыв,
Кӧн эськӧ оліс ва и вӧр,
И мортлӧн шог и шуд,
Но аслам сёрниыслысь шӧрт
Ме йитлыны ог куж...
Со сійӧ кыскис табак доз
Да босьтіс биа рос,
Но пӧрысь мортлы быдса содз
Ми сетім папирос,
Мед сӧмын сёрниыс эз ор,
Кыдз орӧ рыжмӧм тыв.
...Яг весьтын кодзувлӧн дзонь шор
Лӧз эрдын восьтіс сыв,
Но ӧти кодзув чуктіс сэсь
Да усьны кутіс друг,
Кыдз быттьӧ сылысь югыд след
Ёсь йывнас вундіс пурт.
И бара пемдіс...
		Кыйсьысь морт
Эз лэптыв весиг юр.
Ю сайын ӧтнас вошӧм морт
Ми пыдди вуджис нюр.
— Ті, том йӧз, — водзӧ шуис дед, —
Он тӧдӧй, — коркӧ тан,
Важ йӧзсянь кыдзи кывлі ме,
И овліс Ӧлек Сан...
Зэв дошлӧй сійӧ вӧлі морт:
Смел, удал, вына, збой —
И уджын сылысь нинӧмтор
Эз мудзтӧд крепыд сой.
Но сылӧн шудыс вӧлі чер,
Дон горйын пуӧм кӧрт...
Эг кутлыв тайӧ черсӧ ме
Да ошйысьны ог мӧд,
Но сылысь ыджыд куим дон
Ён мортлӧн тӧдіс ки:
Кор кучкас сійӧн удал зон —
Вӧр пасьта кыптас би;
Кор чернас мӧдысь сӧтас зон,
Сэк босьтчас ыджыд тӧв,
И тайӧ паськыд Йӧртӧм дор
Пыр воштас ассьыс чӧв.
А нӧшта сӧтыштас кӧ морт
Да черӧн кисьтас чаг,
То синваысь на сӧстӧм шор
Сэк чужтас джуджыд яг.
Уралын, кисьтӧны кӧн кӧрт
Да калитӧны сталь,
Роч мортлӧн киысь донатор
И аддзис Ӧлек Сан.
Гӧль коми мортлӧн муса вок —
Искуснӧй роч кузнеч,
Кыдз ичӧт воклы ыджыд вок,
Шуд вылӧ дорис чер.
— Мед тайӧ черыс — дружба пас —
Ми костын нэм оз быр,
И, — шуис, — рочкӧд комияс
Мед ӧтлаынӧсь пыр.
Кыдз сӧмын сӧтыштіс ён ки
Яг вылысь пожӧм пу,
Пыр кыптіс вӧрын ыджыд би,
Лёк йӧзлы потшис туй.
Выль стража татчӧ ыстіс царь,
Мед мортӧс дорны пыр,
Но кыкысь сӧтіс Ӧлек Сан,
Став пуяс ӧвтігтыр,
Друг кыптіс тӧв. И некод тась
Эз аддзы петан туй,
Став парма пасьта ыджыд ва
Тан пӧльтчис, кыдзи ю.
И тайӧ юлы коми морт
Ним сетіс Йӧртӧм ва,
Кӧн лёк неправдаыслысь горш
И пӧдтіс Ӧлек Сан.
Со сійӧ шлывгӧ водзӧ пыр
Век важкодь збой да том.
Жаль, мортлы сылысь сёрни-кыв,
Зон, велавны оз позь,
Но важ йӧз помнитӧны век
Смел морт йылысь бур висьт.
Мен тайӧс висьталіс дзор дед,
А месянь кыліс пи.
Неправда сэки вӧлі ён:
Сы киын вӧлі власть.
Невӧля везйын и роч вок
Эз вермы сетны отсӧг, зон,
Тэн, удал Ӧлек Сан!
Сибирӧ перйыны руда
Кык стражник костын сэк
Нэм кежлӧ ыстіс мортӧс царь,
И кыліс чужан му и ва,
Кыдз шогсис сьӧкыд чеп...
Но черыс лёк йӧзлы эз сюр.
— Со тайӧс видзӧй ті, —
Сэк шуис йӧзлы, — воас лун,
Кор враглӧн киссяс вир...
И збыльмис сылӧн ыджыд кыв:
Народлы ковмис чер,
Кор пансис мездлун вӧсна тыш,
Кор врагкӧд пансис вен.
Уралса отсаліс кузнеч
Смел коми мортлы тан
Ас киас босьтны шудсӧ сэк,
Став чужан му и ва.
И озыр йӧзыслысь лёк власть
Сэк киссьӧмысь эз пык
Английскӧй пушка да тесак,
Американскӧй штык.
Выль томлун аддзис парма-вӧр,
Выль шудлун аддзис му,
Кӧн юргӧ сьыланкывлӧн гор
Да вӧльнӧй мортлӧн удж.
И тайӧ югыд Йӧртӧм ва —
Том йӧзлӧн медбур друг.
Быд тӧв и тулыс — некор тан
Оз ланьтлыв кыпыд удж.
Вӧр лэдзысь киын лэчыд чер
И электропила,
Мый йылысь мӧвпыштнысӧ сэк
Эн кужлы, Ӧлек Сан!
Дыр кывзім дедлысь тайӧ висьт.
Веж пармалысь важ мойд.
И бипур югӧр улын ми
Эг тӧдлӧй, коли вой.
И сӧмын лэбач чолӧм-кыв
Выль лунлы сьыліс кор,
Ми тэчим сьӧлӧмӧ мойдкыв
Да колим Йӧртӧм дор.
Кӧть кадыс вӧлі ёна водз,
Но кыакӧд жӧ тшӧтш
Делянка сьӧлӧмын мотор
Вӧр пасьта кисьтіс дрӧб.
Сэн вӧлі сиктса варов зон
(а, гашкӧ, дедлӧн пи!)
Кер тырӧн кыскис уна додь
Том, удал тракторист.
Збой нывлӧн киясын мотор
Кыдз ворсіс, завидьлун
Ме сэки ассьым, дона вок,
И дзебнысӧ эг куж.
Пыр меным кажитчис, со тан,
Кӧн кывтӧ Йӧртӧм ю,
Збой уджын удал Ӧлек Сан
Тшӧтш юкӧ йӧзлысь шуд.