* * *

Пуяслысь вижӧдӧм коръяс
Кӧдзӧ асфальт вылӧ ар.
Сьӧлӧмӧс некод оз торйӧд
Тэысь, рӧднӧй Сыктывкар.

Эм тэнад серпасад вунтӧм
Войвывлӧн аснога мич:
Пармалӧн тӧрытъя думыс,
Шонділӧн талунъя дзирд.

Биясӧн кытшалӧм скверын
Тополькӧд сывъясис ньыв,
Юралӧ том йӧзлӧн серам,
Кылӧ Куратовлӧн кыв.

Ӧтвылысь накӧд ме сьыла,
Ошка и турӧб и зэр.
Тэ весьтын паськаліс ылӧ
Енэжлӧн кодзулӧсь эрд.

Муслунӧс тэ дінӧ восьтны
Мичаджык кывъяс ог корсь.
Радейта...
Кылысь ог соссьы
Тэ кодь жӧ шудлуна морт.