ТУРИЯС ЛЭБӦНЫ БАРА

Турияс лэбӧны бара,
Горзӧмыс кылӧ зэв нор.
Ӧшиньӧ зумыштчӧм арыс
Шыбитіс вижӧдӧм кор.

Жаль кольӧм гожӧмыс пыр на,
Бергӧдны сійӧс оз позь.
Тӧв йылын ньӧжйӧник сырмӧ
Пужъялӧм лапъяса коз.

Тӧв еджыд турӧбнас воас,
Тыртас быд ордым да чой.
Кӧсъян — он кӧсйы, а ковмас
Кывзыны пыр ӧти мойд.

Кедзовтны ас чужан мусӧ
Оз вермы радейтысь морт,
Весиг и туриӧс кутӧ
Му вылын дзик ӧти горт.

Тулыслысь лов шы кор кылас
Лым улысь мездысьӧм вӧр,
Гора да збой сьыланкывйӧн
Турияс локтасны бӧр.

На кодь жӧ шуд сӧмын кора
Аслым и челядьлы ме:
Муслунсӧ чужан му дорӧ
Нинӧм мед мӧдтор оз вен.